சி.ஐ.ஏ. ரகசிய ஆபரேஷன்: இந்த திருப்பத்தை எதிர்பார்த்திருக்க முடியாது!

Viruvirupu, Tuesday 20 December 2011, 14:54 GMT
அத்தியாயம் 06

1960-ம் ஆண்டு மே, 1-ம் தேதி. சோவியத் ரஷ்யாவில் மே தின ஊர்வலங்களும், தொழிலாளர்கள் எழுச்சிக் கூட்டங்களும் நடைபெற்றுக் கொண்டிருந்தன.  அன்று தேசிய விடுமுறை என்பதால் விமான நிலையங்கள் மூடப்பட்டிருந்தன. (ஆம். 60-களில் ரஷ்யாவில் தேசிய விடுமுறையின்போது விமான, ட்ரெயின், பஸ் போக்குவரத்துக்கள் எவையும் இயங்காது) எந்தவொரு விமான நடமாட்டமும் இல்லாமல் பளிச்சென்று இருந்தது ரஷ்ய வான்பரப்பு.

ரஷ்யாவின் டையுரடாம் என்ற இடத்திலுள்ள ஏர் ட்ராபிக் கன்ட்ரோல் மையத்தில் ராடார்கள் எந்தவித விமான அசைவுகளையும் காட்டாமல் அமைதியாக இருந்தன. வழமையான ஒரு ஷிஃப்ட்டில் 20 பேர் வேலை செய்யும் அந்த மையத்தில், வெறும் இரண்டே இரண்டுபேர் அமர்ந்து சோம்பலாக ராடார் திரைகளைப் பார்த்தபடி இருந்தார்கள்.

அந்த நேரத்தில்தான் அமெரிக்காவின் யூ-2 உளவு விமானம் திருட்டுத்தனமாக ரஷ்ய வான் எல்லைக்குள் பிரவேசித்தது.

யூ-2 விமானத்துக்குள் அமைக்கப்பட்டிருந்த அந்த நாளைய கேமரா (அதன் அளவைப் பாருங்கள்!)

பாகிஸ்தானின் பெஷவாரில் இருந்து கிளம்பி, நோர்வே நாட்டின் போடோவுக்கு மேலாகப் பறந்து, ரஷ்யாவின் பனிமலைகளுக்கு அருகே ஸ்வெட்லோவ்ஸ்க் ஊடாக ரஷ்ய வான்பரப்புக்குள் உட்புகுநடதது யூ-2.

ரஷ்ய வானில் எந்தவித விமான அசைவுகளும் இல்லாத நிலையில் க்-2 விமானம் மிகத் தெளிவான ஒரு புள்ளியாக ரஷ்யர்களின் ராடாரில் தெரியத் தொடங்கியது.

சோம்பலாக சாய்ந்திருந்த இரு ரஷ்ய ஏர் ட்ராபிக் கன்ட்ரோலர்களும் துள்ளி எழுந்தனர். ராடாரில் தெரியும் புள்ளி யாருடைய விமானம் என்று அறிவதற்காக தமது சென்ட்ரல் கன்ட்ரோல் டவரைத் தொடர்பு கொண்டனர்.

இதற்கிடையே உளவுவிமானம் ஸ்வெட்லோவ்ஸ்க் அருகேயுள்ள அணுசக்தி மையத்துக்கு மேலாக 70 ஆயிரம் அடி உயரத்தில் பறக்கத் தொடங்கியது. (சாதாரண பயணிகள் விமானம் பறப்பது 32,000-38,000 அடி உயரத்தில்)

வாஷிங்டனில் அப்போது நேரம் காலை 10.30.

வாஷிங்டன் ஹேய் ஸ்ட்ரீட்டில் அமைந்திருந்தது யூ-2 உளவு விமானத்தின் கட்டுப்பாட்டு மையம். (உளவு விமான ஆபரேஷன் முழுவதும் பிஸ்ஸலின் கைகளில் இருந்த காரணத்தால், அந்த நாட்களில் வாஷிங்டன் ராணுவ மட்டத்தில் இந்த மையத்தை பிஸ்ஸல் சென்டர் என்று அழைப்பார்கள்) அப்போது உளவு விமானம் தொடர்பான முதலாவது மெசேஜ் வந்தது.

பெயர் குறிப்பிட முடியாத ஐரோப்பிய நாடு ஒன்றிலிருந்த சி.ஐ.ஏ.-யின் ரகசிய கன்ட்ரோல் சென்டரில் இருந்து ரேடியோ மூலமாக வந்தது ஒரு வார்த்தையில் அந்தத் தகவல். “பில்லி பெய்லி வீட்டுக்கு வந்து சேரவில்லை”

யூ-2 உளவு விமானம்

இந்தத் தகவல் வந்தவுடன் பிஸ்ஸல் சென்டர் பரபரப்பாகிவிட்டது. ‘பில்லி பெய்லி’ என்பது யூ-2 உளவு விமானத்தின் சங்கேதப் பெயர் என்பது பிஸ்ஸல் சென்டரில் இருப்பவர்களுக்குத் தெரியும்.  யூ-2 விமானம் அன்று காலை உளவு பார்ப்பதற்காக ரஷ்யாவுக்கு மேலாய் பறந்திருக்க வேண்டும் என்பதும் அவர்களுக்குத் தெரியும்.

யூ-2 ஆபரேஷன் பொறுப்பாளர் ரிச்சர்ட் பிஸ்ஸல்

தகவல் வந்தபோது பிஸ்ஸல் சென்டரில் டியூட்டி அதிகாரியாக இருந்தவர் பாப் கிங். பின்னாட்களில் பேட்டி ஒன்றில் பாப் கிங், தமக்கு தகவல் வந்த நிமிடம் பற்றி இப்படிக் குறிப்பிட்டார் – “ரேடியோவில் இந்தத் தகவல் மிகவும் தெளிவாக, அந்த அறையில் இருந்த அனைவருக்கும் கேட்குமாறு ஒலித்தது. அறையில் சுமார் 20 பேர் பணி புரிந்து கொண்டிருந்தார்கள்.

தகவல் வந்த அடுத்த விநாடி நிஜமான திகிலை அடி வயிற்றில் உணர்ந்தோம். ஒரு கனத்த மௌனம் அந்த அறையில் நிலவியது. அது ஒரே ஒரு விநாடிதான் நீடித்தது.  மறு விநாடியே அங்கிருந்த அனைவரும் அடுத்துச் செய்ய வேண்டிய காரியங்களை, தலைவெட்டப்பட்ட உடனே கோழி துடிப்பதுபோல பதறிப் பதறிச் செய்யத் தொடங்கினார்கள்.”

விமானம் மிஸ்ஸிங் என்ற தகவலை பாப் கிங், யூ-2 ஆபரேஷனின் சீஃப் பிஸ்ஸலுக்கு உடனே தெரிவித்தார். பிஸ்ஸல் ஆபரேஷன் சென்டருக்கு வந்துசேர மதியமாகி விட்டது.  வருவதற்கு முன்னர் சி.ஐ.ஏ.-யின் தலைமைச் செயலகத்தில் இருந்து சில தகவல்களை சேகரித்துக் கொண்டு வந்தார்.

அந்தத் தகவல்களின்படி, யூ-2 விமானத்தில் தொழில்நுட்பக் கோளாறு ஏற்பட்டதாகவோ, வேறு ஏதாவது இடத்தில் எமர்ஜன்சி லேன்டிங் செய்ததாகவோ தகவல் இல்லை. அத்துடன் யூ-2 விமானத்தின் விமானி ஆபத்தைக் குறிக்கும் ஸ்ரெஸ் மெசேஜ் எதையும் தரையிலுள்ள எந்தக் கட்டுப்பாட்டு மையத்துக்கோ, அமெரிக்க விமானத் தளத்துக்கோ அனுப்பியதாகவும் தகவல் இல்லை.

பிஸ்ஸல் ஆபரேஷன் சென்டருக்குள் பிரவேசித்தார்.

யூ-2 விமானத்தை வெறும் வரைபடத்தில் இருந்து உருவாக்குதலில் முழுமையாகச் செயற்பட்டு, அந்த விமானம் பெற்றுக் கொடுத்த உளவுத் தகவல்கள் அமெரிக்க ஜனாதிபதியிடம் காட்டியதுவரை, இந்த ஆபரேஷனே முற்று முழுதாக பிஸ்ஸலின் குழந்தை. 24 மணிநேரமும் அவரது சிந்தனை இந்த உளவு விமானத்தில் இருந்த நாட்கள் அவை.

அப்படியான நிலையில் இருந்த பிஸ்ஸல், யூ-2 விமானம் காணாமல் போனதை எப்படி எடுத்துக் கொண்டார்?

இதோ, பாப் கிங் பின்னாட்களில் கொடுத்த பேட்டியிலுள்ள வாக்கியங்களைப் பாருங்கள் –

“பிஸ்ஸல் ஆபரேஷன் சென்டருக்கு வந்தபோது, நாம் பதறியபடி இருந்தோம். ஆனால் அவரோ, எந்தவித பதட்டமோ படபடப்போ இல்லாமல் ஒரு சாதாரணமான திங்கட்கிழமை மாலை நடைபெறும் ஊழியர் கூட்டத்துக்கு வருவதுபோல வந்தார். ‘எல்லோருக்கும் மாலை வணக்கம். எமது யூ-2 உளவு விமானம் காணாமல் போய்விட்டது.  அது அநேகமாக ரஷ்ய வான்பரப்பில் வைத்து ரஷ்யர்களால் சுட்டு வீழ்த்தப்பட்டிருக்கலாம் என்று நினைக்கின்றேன்’ என சர்வ சாதாரணமாகச் சொன்னார் – இன்று காலையில் பான்கேக் சாப்பிட்டேன் என்று சொல்வதுபோல!”

“யூ-2 உளவு விமானம் 16 மில்லியன் அமெரிக்க டாலரில் (1960-களில் இது பெரிய தொகை) உருவாகிய திட்டம்.  விமானம் ரஷ்யர்களால் சுட்டு வீழ்த்தப்பட்டது ஒரு இழப்புத்தான்.  ஆனாலும் 16 மில்லியன் டாலரைவிட அதிக பெறுமதியுள்ள உளவுத் தகவல்களை எங்களுக்கு ஏற்கனவே யூ-2 சேகரித்துக் கொடுத்திருக்கின்றது” என்றார் பிஸ்ஸல்.

“விமானத்தின் விமானி…” இழுத்தார் பிஸ்ஸலின் உதவியாளர்களில் ஒருவர். விறுவிறுப்பு.காம் ..அடுத்த பக்கம் வாருங்கள்

Follow viruvirupu on Twitter
∇ LATEST UPDATES ∇
பிரீமியம் கட்டுரைகள்>Ⓟ
தமிழகத்தில் உளவு பார்த்த ISI உளவாளிகள்: 4 பேர் கஸ்டடியில், 20 பேர் ரகசிய சாட்சிகள்!Ⓟ Saturday 25 October 11:57 GMT
ஜனாதிபதி குற்றவாளியாக சர்வதேச நீதிமன்றத்தில், விவசாயிகள் சொந்த ஊருக்கு பஸ்ஸில்Ⓟ Saturday 25 October 10:15 GMT
போர் விமானத்தால் பலவந்தமாக தரையிறக்கப்பட்ட ஆஸி விமானிகள் மீண்டும் காக்பிட்டில்!Ⓟ Saturday 25 October 07:21 GMT
கொபானியில் கெமிக்கல் ஆயுதங்கள்? பெரிய குண்டு வெடிப்பின் பின் காற்றில் பரவும் வித்தியாச மணம்!Ⓟ Saturday 25 October 06:24 GMT
தமிழக ‘திரைமறைவு’ அரசியலில் நமது காதுக்கு வந்து சேரும் விஷயங்கள்-2Ⓟ Saturday 25 October 04:39 GMT
நாடு நாடாக உளவு வேலை: CIA-வை தவிர வேறு யார் இந்த விளையாட்டு விளையாடுவர்?Ⓟ Friday 24 October 13:59 GMT
ISIS கையில் சிறிய அணு ஆயுத டிவைஸ்கள்: உளவுத்துறை கூறும் பகீர் விவகாரம் இதுⓅ Friday 24 October 12:10 GMT
“ராஜபக்ஷேவை வைத்து விளையாடுவது இப்ப ரொம்ப ரிஸ்குங்க” அலறுகிறது ப.தி.வே. டீம்!Ⓟ Friday 24 October 11:16 GMT
கொழும்புவில் இருந்து கிளம்பிய சீன நீர்மூழ்கி, இந்திய கப்பல்களை ‘பெட்டி’ அடிக்கவா?Ⓟ Friday 24 October 08:33 GMT
கொபானியில் திருப்பம்: அமெரிக்க ஆதரவு போராளிக்குழு FSA நகருக்குள் போய் இறங்குகிறது!Ⓟ Friday 24 October 04:10 GMT